- Advertisement -

Kolbeinn vill Samfylkinguna til nútímans

Kolbeinn Óttarsson Proppé, þingmaður Vinstri grænna, er ekki hrifinn af pólitík Samfylkingarinnar. Hann birtir þetta:

„Við samþykktum uppfærða fjármálastefnu til næstu ára í gærkvöldi. Með henni er byggt ofan á þá framsæknu og árangursríku stefnu sem fylgt hefur verið á kjörtímabilinu. Stefnu sem hefur meðal annars skilað meiri aukningu í fjárfestingar í heilbrigðismálum, menntamálum, velferðarmálum, nýsköpun og rannsóknum en sést hefur um háa herrans tíð.

En nú tökumst við á við kórónakreppuna og þá þarf að bæta enn frekar í. Það þarf að nota skynsamlegar leiðir vinstri mennskunnar; ríkissjóði verður verður beitt af fullum þunga til að verja velferðina og um leið verður gríðar miklum fjármunum veitt í hin ýmsu mál til að við getum vaxið úr kreppunni. Með því að láta ríkissjóð safna skuldum getur hann varið fólkið í landinu fyrir meginþunga áfallsins.

Þú gætir haft áhuga á þessum

Kannski átti það ekkert að koma á óvart.

Þetta hélt ég að væri stefna sem Alþingi gæti sameinast um, eða að minnsta kosti flokkar sem skilgreina sig til vinstri, og því varð ég undrandi þegar atkvæði voru talin. Viðreisn greiddi atkvæði gegn þessari stefnu, sem kemur kannski ekki á óvart með slíkan hægri flokk. En það gerðu Píratar líka og einnig Samfylkingin. Hún sat ekki einu sinni hjá heldur greiddi mótatkvæði; Samfylkingin er beinlínis á móti stefnunni og þeim aðgerðum sem á henni byggja.

Hvernig flokkur sem kallar sig jafnaðarmannaflokk Íslands komst að þeirri niðurstöðu að leggjast bæri gegn því að sameiginlegum sjóðum sé beitt til að verja samneysluna og örva hagkerfið er mér einfaldlega óskiljanlegt. Að sjálfur jafnaðarmannaflokkurinn hafni leið jafnaðarmennskunnar út úr kreppunni. En kannski átti það ekkert að koma á óvart. Þegar hlustað er á málflutning Samfylkingarinnar má ekki skilja annað en að hver einasta ákvörðun ríkisstjórnarinnar vegna heimsfaraldursins sé slæm. Hverri nýrri aðgerð er mætt með slíkum kynjum að halda mætti að hver og ein þeirra sé versta aðgerð sögunnar.

Sem betur fer virðist fólkið í landinu sjá í gegnum þetta. Það sér að margt býsna gott hefur verið gert, eins og kom fram í könnun í vikunni. Það væri óskandi ef Samfylkingin gæti látið af þessari gamaldags pólitík og komið með okkur í þá mikilvægu vegferð sem ný fjármálastefna markar. Það væri óskandi að Samfylkingin legði meiri áherslu á að byggja brýr og samstöðu um að koma áherslum jafnaðarmennskunnar í framkvæmd.“


Auglýsing

Tengdar fréttir sem þú gætir haft áhuga á að lesa: