Sveinseyrarpóstur Sigurðar G. Tómassonar:
Andrés Indriðason var ljúfur maður í viðkynningu og samstarfsgóður. Við störfuðum saman að spurningakeppni framhaldsskólanna, Gettu betur. Ég stjórnaði keppninni í útvarpi en þótti reyndar ekki nógu smáfríður fyrir sjónvarp. Það var reyndar ekki dómur Andrésar. Blessuð sé minning hans.
Hef aldrei vitað aðra eins blómstrun hjá trjám og nú. Ég grilli í þetta, þótt sjónin sé döpur. Reyndar er allur gróður með ólíkindum þessa dagana. Hrossakastanía frá Álandseyjum sem þau gáfu okkur Kristbjörg og Per tekur nú gríðarlegum framförum og er að verða mannhæðarhá.
Þegar ég er mjög slappur á morgnana hugsa ég með mér: Best að reyna að bera sig vel. Svo maður verði ekki gripinn og settur á hæli!
Geðmundur lætur orðið afgerandi fara í taugarnar á sér. Held þetta sé gömul dönskusletta. Allir Eiríkar samtímans munu ekki megna þess að fá mig til þess að samþykkja þetta. Held við höfum lengst af notast við sögnina að ráða í þessu samhengi. Úrslit kosninganna í Póllandi munu verða ráðandi um framtíð landsins eða ráða miklu um….
