Hætta báðir formennsku í sínum flokkum, Bjarni og Sigurður Ingi?
„Ég held líka að Sjálfstæðisflokkurinn horfist í augu við þá staðreynd að hans valdaskeiði er lokið í bili. Það eru engar líkur á því að hann nái sér upp með óbreyttri forystu og sömu málefnaáherslum. Hann þarf tíma til að gera breytingar á bæði forystunni og á stefnuáherslum áður en hann leggur í kosningar,“ sagði Össur Skarphéðinsson í áðurnefndu Moggaviðtali.
„Svo má velta fyrir sér hvort Framsókn og Sjálfstæðisflokkurinn ætla að leyfa Kristrúnu að verða einu nýju forystukonunni sem dansar á kosningaballinu? Mér kæmi ekki á óvart þótt forystuskipti yrðu á þeim bæjum áður en kemur í kosningar, enda efnilegar forystukonur í báðum flokkunum. Þannig að mér finnst ólíklegt að ríkisstjórn slitni með þeim hætti að boðað verði til kosninga áður en kjörtímabilið er úti. Annað mál er hvort VG tapi úthaldinu, og kjósi að byggja sig upp í stjórnarandstöðu fyrir næstu kosningar. En þá dugar flokkunum sem fyrir eru að kippa inn einhverjum smáflokkanna sem myndu glaðir hoppa í ból VG án þess að gera neinar sérstakar kröfur.“
