- Advertisement -

Fær blóð mitt til að sjóða

„Það hefur verið ömurlegt að horfa upp á hroðann vella út af þessari fyllerísupptöku yfir á spjöld sögunnar.“ „Þetta er fólkið sem á að vera að bæta lögin til að eyða mismunun, sér í lagi fjölþættri mismunun eins og fötluð kona býr við hvern einasta dag.“

Guðlaug Svala Steinunnar Kristjánsdóttir skrifar: 

Jæja. Var ekki einhver að leggja til um daginn að hætta að nota ávörpin háttvirtur og hæstvirtur á þingi? Legg til að það verði gert strax í dag.
Það hefur verið ömurlegt að horfa upp á hroðann vella út af þessari fyllerísupptöku yfir á spjöld sögunnar í dag en – kannski vegna fyrri reynslu af því mörgu og misjafna sem viðgengst bak við helgislepjufrontinn hist og her – þá get ég ekki sagt að mér hafi brugðið hið minnsta. Því miður.
En nú sýður á mér og ég ætla að hætta að yppta öxlum yfir þessu ólánsama fólki og rasa aðeins út.
Ég er nefnilega svo lánsöm að hafa fengið að bakka Freyju Haraldsdóttur upp sem næsta kona á lista hjá Bjartri framtíð hér um árið og eiga þannig þátt í að koma hennar mjög svo mikilvægu rödd inn á Alþingi Íslendinga. Nauðsyn þess að hún færi þar inn sást í sinni einföldustu – en líka augljósustu – mynd í veseninu sem varð í kringum pontuna og þingsalinn. Að fólk skyldi dirfast að hafa áhyggjur af sögufrægu timbri í stað þess að hunskast til að horfast í augu við að þjóðþingið okkar var á þeim tímapunkti ekki ætlað öllum, segir allt sem segja þarf um þau tímamót sem þarna urðu.
Að fullorðið fólk skuli tala svona um fyrrum samstarfskonu, sem hefur lagt – og mun leggja – svo óendanlega margt gagnlegt til þjóðmálanna skuli sýna af sér þvílíka lágkúru eins og raun ber nú vitni fær blóð mitt til að sjóða.

Þetta er fólkið sem á að vera að bæta lögin til að eyða mismunun, sér í lagi fjölþættri mismunun eins og fötluð kona býr við hvern einasta dag. Hvernig er hægt að ímynda sér að fólk sem tjáir sig svona um strangheiðarlega, þrotlausa baráttukonu sem hefur fengið það hlutskipti að hreinlega ryðja brautina með eigin líkama og einkalífi gegn fáránlega sterku tregðulögmáli, almennu skilningsleysi, hroka og þröngsýni, sé á nokkurn hátt fært til að sitja við að semja og samþykkja lög til að tryggja mannréttindi í landinu? Hvernig? Endilega segið mér það, því ég sé það ekki.
Hvaða skilning á fjölbreytni mannlífsins sem Alþingismenn eiga að vinna fyrir er þetta fólk að sýna?
Þetta er ekki hægt!!!
Bara ekki.
Ef við verðum búin að jafna okkur á þessu á morgun og höldum áfram að kjósa svona fólk til að vinna fyrir almannahag þá eigum við ekkert gott skilið, annað en að skammast okkar.

Fengið af Facebooksíðu Guðlaugar. Fyrirsagnir eru Miðjunnar.

Þú gætir haft áhuga á þessum

Booking.com

Auglýsing

Tengdar fréttir sem þú gætir haft áhuga á að lesa: