- Advertisement -

Grásleppan stendur í Vinstri grænum

Varaþingmaðurinn Bjarni Jónsson  og  þingmaðurinn Lilja Rafney Magnúsdóttir. Grásleppuinngrip sjávarútvegsráðherra mun reyna á  VG-liða. Svo um munar.

„Það eru margar farsælli leiðir til að stýra grásleppuveiðum en kvótasetning og engin gögn eru til staðar sem réttlæta fyrirvaralausa stöðvun hrognkelsaveiða, sem virka meira eins og aðgerð ráðherra til að hegna grásleppusjómönnum fyrir að hafa staðið í vegi fyrir og verið andvígir því að afhenda veiðiréttinn nokkrum, loka fyrir nýliðun og opna fyrir að hægt verði að safna grásleppuleyfum á fáar hendur,“ þetta eru orð Bjarna Jónssonar (Bjarnasonar), varaþingmanns Vinstri grænna, vegna ákvörðunar Kristjáns Þórs Júlíussonar sjávarútvegsráðherra um stöðvun grásleppuveiða. Lilja Rafney Magnúsdóttir er formaður atvinnuveganefndar. Ákveðni Bjarna Jónssonar er mun meiri en Lilju Rafneyjar.

„Ráðherra kýs í þessu skyni að taka fyrir byggðarlög eins og Stykkishólm og fleiri við Breiðafjörðinn og kippa undan fjölda fólks þar lífsbjörginni. Meira virðist vera af hrognkelsum á ferðinni en oft áður og góð veiði er sannarlega vitnisburður um. Þau gögn sem Hafró styðst við í veiðiráðgjöf á grásleppu eru veigalítil og ófullkomin og væri heiðarlegast af stofnuninni að viðurkenna það og ráðherra að láta vera að misnota þá stöðu. Vonandi mun kvótafrumvarp hans fá að liggja áfram milli þilja á alþingi. Í millitíðinni þurfa fræðimenn utan Hafró að rýna betur gögn, framkvæma þarf frekari rannsóknir og skynsemdarfólk að leiða saman hesta sína og undirbyggja og leggja fram útfærðar tillögur um farsæla veiðistjórnun grásleppuveiða í þágu byggðanna,“ skrifar Bjarni Jónsson.

Lárus Ástmar Hannesson í Stykkishólmi skrifar: „Þessi ákvörðun er algjörlega galin. Vissulega er kvótinn búinn en hvað ætli segi betur til um stærð stofnsins en raunverulegt fiskirí. Það verður að taka með í reikninginn að á mörgum undanförnum árum hefur kvótinn ekki verið veiddur að fullu. Þessi ákvörðun er reiðarslag fyrir okkar samfélag.“

-sme


Auglýsing

Tengdar fréttir sem þú gætir haft áhuga á að lesa: