Sigurjón M. Egilsson:
Ekkert hefur breyst og þau moldríku telja ekki á annað þorandi en að halda Moggasiglingunni áfram. Jafnvel þó þar birtist og birtist ekki það sem er ritstjóranum hjartans mál.
Davíð ritstjóri hefur tekið ákvörðun. Hann ætlar að stunda kjánalegustu kosningabaráttu sem sögur fara af. Davíð styður Donald Trump. Það er svo sem ekkert nýtt. Hitt er annað að fyrr í þessari viku birti hann forsíðufrétt um ólánsaman forsetason. Og ekki bara það. Heldur og var leiðari þess sama dags helgaður syni Badens Bandaríkjaforseta.
Nú, í gær var Trump kallaður fyrir dómara þar sem honum var afhent grafalvarleg ákæra. Heimssjónvarpsstöðvarnar voru með beinar útsendingar frá ferðalagi forsetans fyrrverandi til dómarans. Og ekki nema von. Hann er sakaður um mjög alvarlegan glæp, eða glæpi. Ætlað að svindla sér til að vera forseti áfram, þrátt fyrir að hafa tapað kosningunum.
Hvað ætla hinir moldríku eigendur Moggans að umbera, hin ævintýralegu ritstjórn Davíðs, lengi? Þau keyptu Moggann í þeim tilgangi að verja kvótakerfið, verja stjórnarskrána og sjá til þess að Íslandi muni ekki sækja um aðild að ESB og krónan yrði áfram gjaldmiðill alls þorra almennings.
Allt hefur þetta gengið eftir. Ekkert hefur breyst og þau moldríku telja ekki á annað þorandi en að halda Moggasiglingunni áfram. Jafnvel þó þar birtist og birtist ekki það sem er ritstjóranum hjartans mál. Þetta er ekkert spaug. Eina dagblaðið er bundið dómgreind ritstjóra sem er eins og hann er.
Lesendum Moggans hefur fækka stórlega í ritstjóratíð Davíðs. Það er ekki nema von. Ritstjórinn hikar ekki við að fremja hryðjuverk á eigin blaði.
