Katrín Jakobsdóttir skrifaði:
„Fyrir allmörgum árum ákváðum við vinkonurnar Halldóra Björt Ewen að sækja um inngöngu í Hið íslenska töframannagildi. Hugmyndin spratt af því að við höfum stundum sýnt töfrabrögð á skemmtikvöldum íslenskunema (sem voru kölluð kraptakvöld í þá daga) og skemmt okkur sjálfum konunglega á þeim sýningum.
Við sóttum sem sagt um inngöngu og mættum á fund gildisins í Breiðholti. Þar tókum við nokkurs konar inntökupróf með því að sýna eitt töfrabragð sem við höfðum lagt töluverða vinnu í ef ég man þetta rétt.
Í stuttu máli var okkur hleypt inn í gildið og við tókum svo þátt í nokkur ár. Hápunkturinn var líklega töfrasýning í Salnum en ég á enn búninginn sem ég nýtti í þá sýningu (og gæti því fræðilega endurtekið þetta atriði).
Ég hef stundum talað um töfrana og einhverju sinni eftir að ég var komin í virðulegt embætti mætti ég á Grund og sýndi töfrabrögð. Fyrir nokkrum dögum var ég svo beðin um að mæta á fund í Hinu íslenska töframannagildi sem var haldinn í gærkvöldi. Þar hlaut ég þá viðurkenningu að vera útnefnd heiðursfélagi Hins íslenska töframannagildis, sú þriðja sem hlýtur þá nafnbót. Mér þótti afar vænt um þessa stund. Og hver veit nema töfrarnir kalli mann aftur til sín!“
Skrif Katrínar er að finna á Facebooksíðu hennar.
