Andstyggileg ríkisstjórn sem hyglir auðvaldinu en úthýsir þeim sem verst eru settir.
Katrín Baldursdóttir skrifar:
Það er komið árið 2020. Fyrsti launaseðill öryrkja kominn í hús. Vonbrigðin eru gríðarleg. Það á að lifa á 220 þúsund krónum á mánuði. En það er ekki hægt. Nístandi fátæktin heldur áfram. Öll loforð stjórnmálamanna svikin. Hvar eru þessir 4 milljarðar sem Katrín Jakobsdóttir talaði um sem aukið framlag til öryrkja? Sú fjárhæð hefur ekki skilað sér. Fyrir öryrkja er ekkert að marka þessar tölur.
Þegar stjórnmálamenn og spekingar af ýmsum gerðum henda fram tölfræðilegum upplýsingum og meðaltölum til að sanna mál sitt er best að trúa því varlega. Yfirleitt fylgja ekki með forsendur, mælikvarðar eða viðmið svo fólk átti sig á réttmæli og áreiðanleika. Og oft er ekki einu sinni tilkynnt hvaðan tölurnar koma. Það er því full ástæða til að draga svona rannsóknir og kannarnir í efa. Hins vegar er ekki hægt að draga í efa launaseðil öryrkjans sem birtur er hér. Það stendur svart á hvítu að honum er ætlað að lifa á 220 þúsund krónum á mánuði. Það er miskunnarlaus ríkisstjórn sem býr svona að veiku fólki. Andstyggileg ríkisstjórn sem hyglir auðvaldinu en úthýsir þeim sem verst eru settir.