Við þurfum að hreinsa fasismann út úr samfélaginu, slaufa honum.
Gunnar Smári skrifar:
Útilokunarmenning er ævagömul hérlendis, var t.d. grunnurinn í flokksstarfi Sjálfstæðisflokksmanna frá því fyrir seinna stríð og allt fram á vora daga. Sjálfstæðisflokksfólk njósnaði um samborgara sína og hélt skrár um pólitískar skoðanir þeirra. Þau sem ekki beygðu sig í einu og öllu undir stefnu Sjálfstæðisflokksins voru útilokuð, mismikið eftir því hversu róttæk þau þóttu. Útilokunin fólst í því að róttækt fólk fékk ekki úthlutað lóðum í sveitarfélagi sem Sjálfstæðisflokksmenn réði, fengu ekki lán, ekki að sækja nám til Bandaríkjanna, ekki vel launaða vinnu, ekki yfirmannsstöðu og svo framvegis.
„Það sem margir virðast ekki átta sig á að slaufunarmenningin er ekkert annað en venjulegur fasismi. Og segir okkur einnig að fasisminn getur þrifist í frjálsum lýðræðisríkjum, samanber McCarthyisminn í Bandaríkjunum á sínum tíma,“ skrifar Brynjar Níelsson þingmaður Sjálfstæðisflokkinn í Viljann í dag og gæti verið að lýsa starfsháttum eigin flokks.
Vonandi nær áhugi Brynjars og annarra Sjálfstæðisflokksmanna á slaufun og útilokun til þess að þeir rannsaki sögu Sjálfstæðisflokkinn. Eðlileg niðurstaða slíkrar rannsóknar væri að flokkurinn seldi Valhöll og greiddi fórnarlömbum útilokunar flokksins síðustu níutíu árin miskabætur. Og legði sjálfan sig niður í kjölfarið. Við þurfum að hreinsa fasismann út úr samfélaginu, slaufa honum.
