Stjórnarseta Bjarna og flokksins skapar óróa og setur fjárhag fólks í varnarlausa stöðu. Kaupmáttur fólks minnkar dag frá degi.
– sme
Þó peningar streymi í ríkiskassann er það ekki vegna starfa eða skemmtun ríkisstjórnarinnar. Bjarni er efnahagsráðherra Íslands. Hrópandi dæmi eru um hversu vanmáttugur hann er. Hér er verðbólga hærri og vextir líka en hjá frændþjóðunum. Þetta segir mikið um hæfi Bjarna. Eða vanhæfi.
Verðbólgan hans Bjarna étur hvern dag bita eftir bita af áunnum launahækkunum launafólks. Ekki sést fyrir endann á því. Þau sem verst hafa það finna fyrst fyrir óstjórninni. Hugur Bjarna varð enn og aftur okkur ljós þegar hann sagði að nýi ráðherrann, Guðrún Hafsteinsdóttir, verði undir smásjánni til að tryggja að hún spili úr útlendingamálunum eins og Jón Gunnarsson gerði.
Næst sagði Bjarni formaður að útlendingamálin séu í kaldakoli. Sjálfstæðisflokkurinn hefur farið með þessi mál, ár eftir ár, með einstaka undantekningum. Bjarni vill samt halda áfram á sömu braut þó að málaflokkurinn sé kominn úr böndunum, hann kosti alltof mikið. Mikið rétt, það er sami Bjarni og sami formaður sem talaði. Í norður og í suður.
Stjórnarseta Bjarna og flokksins skapar óróa og setur fjárhag fólks í varnarlausa stöðu. Kaupmáttur fólks minnkar dag frá degi. Þetta er alvarlegt. Fólk á nánast enga kosti. Spariféð brennur upp, hvern dag. Enn er því miður langt til kosninga.
