- Advertisement -

Aukin átök innan ríkisstjórnarinnar

- opinber ágreiningur eykst dag frá degi. Viðreisn berst fyrir lífi sínu. Forsætisráðherra situr á meðan á fyrirmennastúkunni í Hollandi.

Leiðtogar hinna ólíku fylkinga ríkisstjórnarflokkanna. Davíð Oddsson er lítt hrifinn af pólitík Benedikts Jóhannessonar, sem á sama tíma berst fyrir lífi eigin flokks.

Ljóst er að átökin aukast milli stjórnarflokkanna. Bjarni Benediktssson forsætisráðherra heldur sig utan við vígvöllinn meðan átökin eru öllum sýnileg. Hann er í frí. Situr sem fastast í fyrirmennastúku á hollenskum fótboltavöllum.

Ráðherrar Viðreisnar eru vopnaðir og fyrir fótgönuliði Sjálfstæðisflokksins fer Davíð Oddsson, sem er fjarri sáttur með frammistöðu eigin flokks, svo ekki sé minnst á Viðreisn. Davíð nefnir flokkanna, það er sinn flokk og Viðreisn; „SjálfstæðisViðreisn“ til að færa forystu Sjálfstæðisflokksins í dag fjær þeim flokki sem hann sjálfur stýrði.

Í dag eru átökin um framtíð krónunnar og vilja fjármálaráðherrans til að auka óbeina skatta.

Davíð Oddssyni er einkum í nöp við Benedikt Jóhannesson, fyrrum flokksfélaga sinn stofnanda Viðreisnar, formann þess flokks og fjármálaráðherra. Eftir að Benedikt setti þessar línur á blað, og birti í Fréttablaðinu í dag, er víst að enn kólnar þeirra í milli.

„En má fjármálaráðherra hafna krónunni? Fjármálaráðherrar í nítján Evrópulöndum hafa þegar hafnað sínum miðli fyrir evruna. Enn fleiri nýta sér evruna án beinnar aðildar eða tengja gjaldmiðil sinn beint við evru. Já, fjármálaráðherra ber skylda til að leggja til þann kost sem er farsælastur fyrir Íslendinga.“

Áráttuhegðun fjármálaráðherrans

Benedikt heillar Davíð ekki. Svo vill til að Davíð skrifar um pólitík Benedikts í leiðara í dag. Þar segir:  „Aðeins tvennt kem­ur til greina; að hækka skatta og álög­ur eða setja á nýja skatta og álög­ur. Kveður svo rammt að þessu að tala mætti um áráttu­hegðun.“

Með skrifum sínum í dag er víst að Benedikt kallar yfir sig frekari viðbrögð frá hagsmunavarnarliði Valhallar. „Nú er tíminn til þess að ýta gömlum kreddum til hliðar og þora að marka leið stöðugleika þar sem hagsmunir almennings og fyrirtækja fara saman. Viðreisn velur stöðugleikann, en til þess að öðlast hann þurfum við öll að vera óhrædd við breytingar eins fljótt og hægt er.“

Forsætisráðherra er enn utan hinna opinberu átaka milli stjórnarflokkanna. Síðast fréttist af honum í fyrirmannastúku í Hollandi.

Lífróður Viðreisnar

Staða Viðreisnar hefur verið skelfileg. Annar hvor kjósandi flokksins hefur yfirgefið hann. Ætli Viðreisn sér áframhaldandi líf þarf eitthvað að gera. Og nú er unnið þar á bæ. Þorsteinn Víglundsson byrjaði með að því að berja á fingur Íbúðalánasjóðs og kom í veg fyrir sölu 300 íbúða, sem eflaust hefðu endað hjá húsaleiguokurfélögum. Þá kom Þorgerður Katrín og hélt fyrri áætlunum um hækkun veiðigjalda og nú kemur formaðurinn og fer gegn sjálfri krónunni. Þá er víst að viðbrögð hinnar virku andstöðu Sjálfstæðisflokksins verða mikil. Sem og hefur orðið. Þau eiga eftir að aukast.

„Viðreisn var stofnuð til þess að stuðla að sátt og stöðugleika. Slíkur stöðugleiki næst aldrei nema með stöðugum gjaldmiðli sem stendur undir nafni og býður upp á svipaða vexti og í nágrannalöndum. Viðreisn bendir á myntráð til þess að festa gengi krónunnar. Mörg Evrópuríki hafa nýtt slíka lausn í áratugi, flest sem áfanga í því að taka upp evru. Eftir hrun töldu sumir krónuvinir að það tæki Íslendinga áratugi að uppfylla skilyrðin fyrir upptöku evru. Eina skilyrðið sem við föllum á núna er of háir vextir,“ skrifar Benedikt.

Frændi hans, Bjarni Benediktsson forsætisráðherra, verður að stíga niður úr fyrirmennastúkunum og gera eitthvað. Taka undir með Davíð í baráttunni gegn Viðreisn, eða fara gegn eigin her, framvarðarsveitinni í Hádegismóum.

Það logar ófriðarbál á stjórnarheimilinu.

-sme


Booking.com

Tengdar fréttir sem þú gætir haft áhuga á að lesa: