Leigjendur: „Hvernig má það vera að stjórnvöld í einu efnaðasta landi veraldar vanræki skyldur sínar í húsnæðismálum viðstöðulaust í aldarfjórðung?
Því slík vanræksla sem birtist einatt í værðarkenndri nálgun, með skeytingarleysi og orðskrúði hefur í för með sér hræðilegar og langvinnar félagslegar afleiðingar fyrir þá standa utan auðs, arfs, sérhygli og spillingartengsla,“ segir Guðmundur Hrafn Arngrímsson formaður Leigjendasamtakanna um húsnæðispakka ríkisstjórnarinnar.
„Aðgerðapakki ríkisstjórnarinnar sem var birtur í fyrradag var yfirfullur af engu.
Það eru engar aðgerðir fyrir leigjendur, engar hömlur á húsaleigu, engar takmarkanir á uppkaupum eignafólks á húsnæði, engin réttarbót né aukið öryggi.
Aðgerðapakkanum er fyrst fremst ætlað að viðhalda alltof háu húsnæðisverði og hræðilegri stöðu leigjenda sem eru og hafa verið nýttir sem uppspretta auðsöfnunar fjárfesta og ekki síst til að fóðra ríkissjóð og standa undir launakostnaði ráðherra og alþingismanna,“ segir Guðmundur Hrafn.
Hér má hlusta á ítarlegt viðtal við Guðmund Hrafn.
