Rás 1: Guðmundur Hrafn Arngrímsson, formaður Leigjendasamtakanna, sagði á morgunvakt rásar eitt í morgun, að takmörkun skattfrelsis á söluhagnað muni ekki hafa tilætluð áhrif.
„Þvert á móti, ef það á að skattleggja söluhagnað þá er kannski ólíklegra að fólk setji þetta í almenna íbúð, inn á sölu fyrir ungt fólk eða þá sem vilja komast inn í séreign. Það er ekki söluhagnaður sem braskararnir eða fjárfestarnir eru eftir. Það er að láta leigjendurna greiða fyrir fjárfestinguna allan tímann meðan þeir búa þarna,“ sagði Guðmundur Hrafn á morgunvakt rásar eitt.
Hann segir fjárfesta viðhalda háu verði á fasteignamarkaði með því að yfirbjóða fólk sem ekki hafi tök á því.
„Þetta eru einstaklingar sem geta og eru að keppa við ungt fólk á fasteignamarkaði, eru að yfirbjóða þessar eignir, eru að halda uppi háu verði, vegna þess að það er eftir miklu að slægjast á leigumarkaði. Þú þarft ekkert að hafa sérstakar áhyggjur af því þó þú bjóðir fimm milljónum króna hærra í þessa fasteign og tryggir þér hana, vegna þess að þú munt fá leigjendur til að borga allan kostnaðinn við íbúðina. En unga fólkið sem vill flytja sjálft inn í íbúðina hefur ekki þennan kost.“
