Bolli Kristinsson:
„Dagur B. er versti borgarstjóri Reykjavíkur frá upphafi.“
„Þetta eru ótrúleg svik og Dagur B. er að kyrkja lífið úr verslun og veitingahúsum á Laugaveginum og neitar öllu samráði. Dagur B. er versti borgarstjóri Reykjavíkur frá upphafi,“ segir Bolli Kristinsson kaupmaður og baráttumaður fyrir opnum Laugavegi.
Eins og Miðjan greindi frá í gær verður Laugavegur, sem og nokkrar aðrar götur, lokaðar fyrir bílum í allan vetur.
„Undirrituð styðja við fjölgun göngugatna í miðborginni. Kannanir sýna að meirihluti íbúa er jákvæður gagnvart göngugötum og að jákvæðust séu þau sem heimsækja svæði göngugatna að minnsta kosti vikulega. Fulltrúar Pírata, Samfylkingar og Viðreisnar í ráðinu samþykkja því tillöguna um framlengingu tímabundinna göngugatna þar til 1. maí 2021 eða þegar nýtt deiliskipulag fyrir varanlegar göngugötur tekur gildi,“ segir meirihlutinn í borgarstjórn.
Vigdís Hauksdóttir berst á móti: „Þetta eru ískaldar kveðjur frá meirihlutanum í upphafi hausts, ekki bara til rekstraraðila heldur líka landsmanna allra. Borgarstjóri og meirihlutinn eiga ekki Laugaveginn og nágrenni hans.“
