Glúmur um biðlaun fyrrum bæjarstjóra: „Gaurinn heimtar biðlaun uppá hálft ár kominn með aðra vinnu fyrir Biskupinn“

Glúmur Baldvinsson veltir fyrir sér hvernig standi á því að fyrrverandi bæjarstjóri Ísafjarðar, Birgir Gunnarsson, fái afar há biðlaun þótt hann hafi farið úr einu starfi í annað án þess að þurfa að bíða eitt né neitt:

„New York vs. Ísafjörður. Ég elska Ísafjörð þar sem ég átti dásamlega æsku. En þrátt fyrir allar dásemdirnar þá veltir maður því fyrir sér hvernig réttlæta megi laun bæjarstjórans,“ segir Glúmur og bætir við að „ég hef komið til Nýju Jórvíkur og hún virkar pínu umfangsmeiri.

Svo ég gæti alls hófs. Árslaun borgarstjóra New York borgar í dag hljóða uppá 34 milljónir. Íslenskar. Laun bæjarstjórans á gamla góða Ísafirði eru um 34 millur. Og þetta gildir ekki bara um Ísafjörð heldur nánast hringinn í kringum landið give or take.“

Glúmi er í raun nóg boðið:

„Og svo heimtar gaurinn biðlaun uppá hálft ár kominn með aðra vinnu fyrir Biskupinn og ekki nóg með það heldur ætlar bærinn að reiða þau fram. Trúir einhvur þessu?“ spyr Glúmur og sækir einfaldlega um vinnu:

„Ég sæki hér með um stöðu bæjarstjóra á Kolbeinsey. Minna að gera og meira golf.“

Bætir að lokum við:

„Í raun dregur svona bull vígtennurnar úr öllum málflutningi byggða landsins um betri afkomu og aukna nýsköpun og styrkari atvinnuvegi og stoðir þegar þær sjá sér fært að greiða litlu sveitarstjórunum sínum slík ofurlaun.“