„Meirihluti félagsmanna okkar telur að Noregur eigi að sækja um aðild að ESB og hefur hlutfallið aukist ár frá ári. Við sjáum einnig að horfurnar á íslenskri ESB-umsókn gera það að verkum að fleiri fyrirtæki telja að Noregur eigi að gera slíkt hið sama,“ segir Petter Tollefsen, yfirmaður alþjóðamála hjá NHO, sem eru stærstu samtök atvinnurekenda í Noregi.
Þetta kemur fram í frétt ff7.is.
Hér á landi er hins vegar aukin andstaða við aðild að Evrópusambandinu í röðum atvinnurekenda. Niðurstöður nýrrar könnunar sýna að af þeim fyrirtækjum sem eru með aðild að Samtökum atvinnulífsins (SA) eru forsvarsmenn 66 prósent þeirra andvígir því að Ísland gangi í ESB, samanborið við 60 prósent í síðustu könnun. Þá eru 22 prósent hlynnt aðild en 12 prósent taka ekki afstöðu.
EES-samningurinn nær nefnilega ekki til tollabandalags ESB.
Þessar tölur voru birtar í gær og leitaði FF7 í kjölfarið svara hjá systursamtökum SA í Noregi um stuðninginn þar á bæ. Samband Noregs við ESB byggist einnig á EES-samningnum.
Í fyrrnefndri könnun SA var spurt hvaða sjónarmið réðu mestu um afstöðu til aðildar að ESB og í svörum atvinnurekenda kom fram að fullveldi Íslands væri það atriði sem flestir settu fyrir sig.
Spurður hvort fullveldið sé norskum fyrirtækjum ofarlega í huga í tengslum við mögulega aðild að ESB þá bendir Tollefsen á að ekki hafi verið gerðar nýlegar kannanir innan samtakanna um ástæður fyrir andstöðu við aðild. Hann segir þó aukna jákvæðni í garð aðildar að ESB skrifast á óvissu í alþjóðaviðskiptum.
„Sá vaxandi fjöldi sem er jákvæður fyrir aðild á líklega rætur að rekja til aukinnar óvissu sem fylgir því að standa einn í heiminum í dag, sérstaklega í viðskiptastefnum,“ útskýrir Tollefsen.
Bankastjóri DNB í Noregi, stærsta bankans þar í landi, lýsti því nýverið yfir að hún óttist að ESB kunni að grípa til tollamúra í auknum mæli og þá geti Noregur lent utan þeirra.
EES-samningurinn nær nefnilega ekki til tollabandalags ESB og því myndi Ísland lenda í sömu stöðu og Noregur ef tollastefna ESB harðnar.
Þessi mál vega ekki þungt í umræðunni hér á landi því rétt 3 prósent svarenda í könnun SA, um mögulega aðild að ESB, nefndu tollamálin sem atriði sem réði mestu um afstöðu þeirra.
.
