- Advertisement -

Sólveigu berst liðsauki

Hvar er nú hið brennandi bál „Mr. star-reporter“?

Össur Skarphéðinsson sér góð tíðindi við lestur Markaðar Fréttablaðsins. Ráðherrann fyrrverandi skrifar:

„Sólveigu Önnu, byltingarforingja hjá Eflingu, hefur bæst óvæntur en öflugur liðsauki við kröfur hennar um mannsæmandi laun. Hann birtist í Markaðinum en svo heitir fylgirit Fréttablaðsins. Það góða blað lifir nú sína glöðustu daga þegar því tekst í ritstjórnargreinum og fréttaáherslum að útmála hinn vaska formann Eflingar sem eins konar efnahagslega hryðjuverkakonu sem helst vill koma Íslandi á vonarvöl.

Harðast gengur fram í þessum soraskrifum „star-reporter“ Hörður Ægisson, sem af innblásnum þrótti ofsatrúarmannsins skrifar leiðara á leiðara ofan um það hvernig kröfur Sólveigar Önnu um 40 þúsund króna hækkun á 3 árum ofan á laun örbjarga láglaunakvenna muni steypa þjóðfélaginu fram af hamfarabrúninni.

En nú ber svo við að Markaðurinn, sem er undir sérstakri ritstjórn „star-reporter“ birti í gær grein sem speglar allt aðra sýn en ausið er daglega úr súrum trogum hans og Fréttablaðsins. Í greininni er lýst þeirri sýn velmetins og þekkts evrópsks eignastýringarfyrirtækis, BluBay Asset Management, að á næstu tólf mánuðum muni gengi krónunnar styrkjast um tíu %, og nægja til að hemja verðbólgu og gera Seðlabankanum kleift að lækka vexti niður í evrópsk mörk. Þetta er töluvert annað slátur en forrit Viðskiptaráðs spúa hráu í leiðara „star-reporter“ Harðar í Fréttablaðinu.

Þetta vandaða fjármálafyrirtæki gefur semsagt ekkert fyrir rausið í Fréttablaðinu og enn minna fyrir leiðara Harðar Ægissonar gegn hryðjuverkakonunni í Eflingu. Þvert á móti spáir BlueBay Asset Management batnandi tíð, þrátt fyrir verkföll.

Markaðurinn, undir stjórn Harðar Ægissonar, segist meira að segja hafa heimildir fyrir því að fyrirtækið sé þegar byrjað að veðja á þessa þróun með því að kaupa íslensk ríkisskuldabréf fyrir hundruð milljóna króna. – Hvar er nú hið brennandi bál „Mr. star-reporter“?

Ég legg til að Hörður Ægisson axli sem óðast sín skinn á Fréttablaðinu, og skundi af bragði heim í beitarhús Viðskiptaráðs. Þar yrði hann vel geymdur innan um hina frjálshyggjubesefana. Þá hættir vonandi Fréttablaðið að spúa fölskum heimsendaspám yfir ræfilsþjóðina okkar, og hættir að ofsækja í leiðurum hinn öfluga formann Eflingar. – Mál er að linni!


Booking.com

Tengdar fréttir sem þú gætir haft áhuga á að lesa: