- Advertisement -

Tveir á kjánalegum flótta undan Vigdísi

Aldrei nokkurn tíma.

Flótti Sigmundar Davíðs Gunnlaugssonar og Gunnars Braga Sveinssonar undan Vigdísi Hauksdóttur er einstaklega kjánalegur. Í stað þess að kjósa milli hennar og Gunnars Braga, um varaformanninn, tóku þeir þá dæmalausu ákvörð að fella niður embætti varaformanns. Segja má að þeir hafi leikið algjöran afleik.

Ekki einni einustu sálu kemur til hugar eitt einasta augnablik að embætti varaformanns hefði verið lagt ef Vigdísi hefði ekki sóst eftir því. Aldrei. Aldrei nokkurn tíma.

Mikið fer fyrir Vigdísi. Hvar sem hún kemur. Gunnar Bragi og Sigmundur Davíð virðast vera í liði með þeim sem eiga erfitt með að umgangast Vigdísi. Þess vegna gripu þeir til þessa einstaka ráðs. Sjálfum sér til háðungar.

„Jú, jú, síminn hefur verið rauðglóandi.“

Vigdís var í viðtali hjá Lindu Blöndal á Hringbraut í gærkvöld. Linda spurði:

„Er ekki hreinlega of lítill biti fyrir þig núna sem stjórnmálamann til margra ára að setjast í staðinn í stjórn með fimm öðrum?“

„Jú það má alveg túlka það þannig,“ svarar Vigdís en telur þó stöðu sína í flokknum „mjög sterka.“

„Jú, jú, síminn hefur verið rauðglóandi,“ segir Vigdís og hún hafi heyrt í mörgum óánægðum flokksmönnum. Hún stefnir þó á að auka fylgi flokksins í borgarmálunum og ætlar að sækjast eftir því að verða næsti borgarstjóri: „Miðflokksmenn og aðrir eru mjög ánægðir með mín störf í borgarstjórn og ég stefni einbeitt á það að gefa kost á mér sem næsti borgarstjóri,“ bætir hún við og hún ætli sér að auka fylgi flokksins fyrir næstu borgarstjórnarkosningar á þarnæsta ári og fyrsta val í samstarfi sé Sjálfstæðisflokkurinn en hún útiloki ekki neina aðra flokka samt.“

Vigdís er söm við sig. Þeir kumpánar Sigmundur Davíð og Gunnar Bragi sitja upp með bæði skömmina og óleyst vandamál.

-sme


Auglýsing

Tengdar fréttir sem þú gætir haft áhuga á að lesa: