Séra Halldór Gunnarsson, fyrrum sóknarprestur í Holti og fyrru áhrifamaður í Flokki fólksins, er ekki sáttur með skrif Ingu Sæland sem Miðjan greindi frá í gær. Séra Halldór er ósáttur með þróun mála, einkum að þingmennirnir Karl Gauti Hjaltason og Ólafur Ísleifsson hafi verið reknir úr flokknum.
Þá finnur hann mjög að því að Inga formaður flokksins skuli samtímis hafa verið gjaldkeri.
„…hvernig Karl Gauti Hjaltason hefði aftur og aftur gagnrýnt fjármálastjórn hennar í áheyrn hennar og því hefðu þau fáu orð tekin upp eftir honum á barnum, átt að vera henni skiljanleg. Engin orð gegn henni voru sögð af dr. Ólafi Ísleifssyni, fremur að hann lagði henni gott til í þessari ólöglegu, samansettu upptöku, sem tók átta daga að vinna úr og koma á framfæri við tvö dagblöð.“
Segir í grein séra Halldórs sem birt er í Mogganum í dag. Blaðið er sem vígvöllur ósættis í Flokki flokksins.
Ekki er víst hvaða dagblöð séra Halldór á við, þar sem á Íslandi eru aðeins gefin út tö dagblöð, Mogginn og Fréttablaðið. Upptökurnar, sem hann segir að hafi verið klipptar til og tekur þar undir með Sigmundi Davíð Gunnlaugssyni, birtust á dv.is, stundin.is og á kvennabladid.is.
Á öðrum stað í greininni segir séra Halldór: „Það eitt að hún skilji ekki að formaður stjórnmálaflokks geti ekki látið kjósa sig gjaldkera flokksins og verið með prókúru flokksins, segir allt um hæfi hennar og skilning á meðferð reikningshalds.“
Séra Halldór er greinilega ekki hrifinn af núverandi tveggja manna þingflokki Flokks fólksins. Hann skrifar: „Uppistaða greinar Ingu Sæland er réttlæting hennar fyrir að hafa rekið tvo þingmenn flokksins, þá þingmenn sem báru uppi málefnastarf þingflokksins, fluttu ræður með rökum, en ekki upphrópunum, létu vinna skýrslur og lögðu fram fyrirspurnir til ráðherra til undirbúnings fyrir flutning mála.“
