Sigurði Inga Jóhannssyni, formanni Framsóknar, hljóp kapp í þegar hann horfði á kvöldfréttir Ríkissjónvarpsins í gær. Hann skrifaði:
„Engin ný tíðindi hér – heldur vantalið ef eitthvað er. Það væri flott fréttamennska hjá RÚV – allra landsmanna að birta hinn listann, þ.e.a.s. yfir stjórnmálaflokka sem flytja störf frá landsbyggðum til Reykjavíkur. Skora hér með á RÚV.
Það er ekkert nýtt – að Framsókn þorir – að Framsókn er róttækur umbótaflokkur – að Framsókn er eini flokkurinn á Íslandi sem flytur störf frá höfuðborg úti á land og framfylgir sömu stefnu um byggðaaðgerð og ríkisstjórnir alla annara Norðurlanda sem hafa flutt stofnanir í stórum stíl frá höfuðborgum til landsbyggða.
Með nútíma fjarskiptum opnast möguleikarnir enn frekar til að fjölga störfum á landsbyggðinni, bæði hjá ríki og atvinnulífi, þ.e. störf án staðsetningar. Það lærðum við í Covid ástandinu og virkar vel. Mestu skiptir að íbúar landsins hafi sem fjölbreyttust tækifæri til að starfa og búa hvar sem er á Íslandi.
Á því sviði stendur Framsókn í stafni stjórnmálanna. Hlakka til að sjá frétt frá RÚV um störf frá landsbyggðunum til Reykjavíkur.“
