Ef okkur finnst þingmenn vera dónar, þá eru þetta okkar dónar. Ef okkur finnst þeir vera vitlausir, þá eru þetta okkar vitleysingar.
Stjórnmál:
Arnar Þór Jónsson skrifaði:
„Inga Sæland kann að syngja lög, en hún er ekki á heimavelli þegar kemur að því að semja lög. Inga getur sungið „Simply the best“ með stæl, en það er nákvæmlega ekkert „stællegt“ að tala eins og götustelpa í ræðustól Alþingis eða senda stríðsyfirlýsingar í nafni „Valkyrjanna“ til manns sem liggur á sjúkrahúsi eftir erfiða hjartaaðgerð. En þótt starfshættirnir séu á lágu og ljótu plani þá er vert að minna á að þetta kusu Íslendingar yfir sig sjálfir í síðustu alþingiskosningum og hvort sem okkur líkar betur eða verr, þá er þetta fólkið sem fer með völdin í landinu – enn um sinn a.m.k.
Ef okkur finnst þingmenn vera dónar, þá eru þetta okkar dónar. Ef okkur finnst þeir vera vitlausir, þá eru þetta okkar vitleysingar. Þetta er gallinn – en kannski kosturinn – við lýðræðið: Það gefur alls konar fólki færi á að tala / syngja sig inn á þing. Platón sjálfur mun hafa viðurkennt áður en yfir lauk að stjórn vitringa væri ekki besta stjórnarformið og að rétt væri að leyfa fólki að velja úr flóru mannlífsins í bland við „beturvitana“.
Á Íslandi eru hlutföllin mögulega öfug nú um stundir, en þetta eru þó, hvað sem öðru líður okkar kjörnu fulltrúar – okkar yfirvöld. Að því sögðu er rétt að undirstrika að Íslendingar hafa ekki gert ESB að yfirvaldi hér á landi og að ESB hefur þ.a.l. engan rétt til að gera tilkall til þess að setja Íslendingum lög sem gangi framar lögum frá Alþingi ef þetta tvennt stangast á.“
