Magnús R. Einarsson skrifaði:
Varaformaðurinn sem pólskir aðdáendur kalla Snorysław Mąsiński, hann hvetur unga mörlanda til að berjast gegn hnignun og glötun íslenskrar þjóðar sem hann segir að sé hætt að fjölga sér.
Facebook:Ég er nú eftir stutta vangaveltu búinn að finna
göfugri tilgang fyrir Miðflokkinn en þann að pönkast á fátæku og stríðshrjáðu
aðkomufólki. Þar sem Miðflokksmenn eru með böggum hildar vegna þess sem þeir
sjá sem hnignun íslenskrar menningar þá er óskiljanlegt að þeir skuli ekki
beita kröftum sínum og berjast af afli gegn innfluttri ómenningu sem á ekkert
skylt við íslenskar hefðir og venjur, hvað þá menningu.
Þar er fyrst til að nefna hið óíslenska Hallóvín, sem er að trylla og villa, ekki bara ungviðið, heldur líka fullorðið fólk, jafnvel þeirra eigin flokksmenn, sem nota þennan útlenska ósið til að neyta óhóflegs magns af áfengi, klætt eins og forynjur og afturgöngur.
Svo getur Miðflokkurinn líka lagst á árarnar gegn Valentínusarvitleyslunni sem á engar menningarlegar rætur hér á Fróni, hressa í staðinn upp á sumardaginn fyrsta sem í den var hefðbundinn trúlofunar og giftingardagur.
…að útrýma óíslensku mataræði…
Þar að auki er dauðafæri fyrir hámenningarsinnaða Miðflokksmenn með sinn káta kappa í forystu að útrýma óíslensku mataræði sem hefur rutt sér til rúms á skömmum tíma í stað hrútspunga, súrra magála og þverskorinnar ýsu. Óíslenskar pizzur, hamborgarar og fleira útslenskt óæti ætti að vera skotspónn hjá flokknum í baráttu hans til að verja íslenska matarmenningu.
Varaformaðurinn sem pólskir aðdáendur kalla Snorysław Mąsiński, hann hvetur unga mörlanda til að berjast gegn hnignun og glötun íslenskrar þjóðar sem hann segir að sé hætt að fjölga sér.
Nú sé ég hann fyrir mér í stafni, langleitan og klæddan smaladressi að berjast gegn Hallóvín, Valentínusarvitleysunni, étandi kæsta skötu í morgun og kvöldskatt, eggjandi fólk til samræðis og barneigna, rymjandi rímur í stað rapps sem er auðvitað ættað úr fátækrahverfum afríkumanna í hnignandi amrískum borgum.
Þess konar barátta eins og ég hef komið hér á framfæri myndi sóma flokknum betur en að hræða fólk á fátækum flóttamönnum sem vilja bara eignast heimili og lifa í friði.
