Ef SA hins vegar taka ekki á málum eru samningarnir settir í uppnám.
Ragnar Önundarson er meðal þeirra fjölmörgu sem hafa brugðist við boðuðum verðhækkunum hjá ÍSAM. Ragnar skrifar þetta:
- 1). SA fara með samningsumboð fyrir aðildarfélög sín. Þeir sem semja hljóta að vilja standa við þann samning sem þeir hafa gert. Ef einstök félög innan SA lýsa sig óbundin af samningnum er ekki mögulegt að gera samninga við SA. Vandamálið er augljóslega hjá SA. Væntanlega bíða verkalýðsfélögin átekta eftir því uppgjöri sem þarf að fara fram. Ef SA hins vegar taka ekki á málum eru samningarnir settir í uppnám.
- 2). Með lífskjarasamningunum eru sköpuð skilyrði til að þjóðarbúið fari í „mjúkri lendingu“ gegnum efnahagslægð. Áframhaldandi stöðugt og tiltölulega sterkt gengi er kjarabót fyrir alla landsmenn, líka aldraða og öryrkja. Þau fyrirtæki sem tilkynna um verðhækkanir fyrir fram á vörum án tillits til þess hvernig gengi krónunnar þróast og ímynda sér að auki að slíkar aðgerðir hafi engin áhrif á eftirspurn eftir vörum þeirra eru á alvarlegum villigötum.
