Sigurjón Magnús Egilsson skrifar: Páll Magnússon, Palli Magg, stökk upp á nef sér þegar fréttist af ófremdarástandi innan lögreglunnar á Suðurnesjum. Þar mun lögreglustjórinn prenta út dónaskap og jafnvel ganga um ber að ofan. Og er þá fleira miður gott látið ótalið. Þar sem aðrir koma við sögu enn Ólafur Helgi Kjartansson eiga hlut að máli.
Palli er fyrsti þingmaður kjördæmisins. Hann sagði: „Ég held að það hljóti að koma til endurskoðunar og athugunar með hvaða hætti skipað er í æðstu embætti lögreglunnar. Þjóðin á þá lágmarkskröfu að yfirmenn innan lögreglunnar séu nokkurn veginn til friðs,” sagði hann.
Já. Áslaug Arna Sigurbjörnsdóttir dómsmálaráðherra fann lausn. Hún ætlar að senda hinn mjög svo umdeilda lögreglustjóra til Vestmannaeyja. Til höfuðvígis Páls Magnússonar, Palla Magg. Nú reynir á innmúraða og innvígða. Ekki er minnsti vafi á að Áslaug Arna á sæti þar. En hvað með Palla Magg? Er hann utangarðs í Valhöll? Og verður að bíta í þau súru epli sem honum eru ætluð?
