Meira að segja Sigmundur Davíð er uggandi um tímasetningu á sölu bankans.
Katrín Baldursdóttir skrifar:
Ef þú ert vinstri manneskja í pólitík, þá kastar þú atkvæði þínu á bálið ef þú kýst Vinstri græna. Það er hreint ótrúlegt hvað þingmaður Vg segir í þessar frétt um söluna á Íslandsbanka. Fyrst hélt ég að það væri Sjálfstæðismaður að tjá sig. Nei, það var Steinunn Þóra Árnadóttir, þingmaður Vinstri grænna sem segir að Vg vilji selja og það sé upplagt að selja bankann núna. Hún sé búin að hlusta á sérfræðinga og þeir segi að lagaumhverfið sé allt orðið svo pottþétt.
En hvaða sérfræðinga hefur hún verið að hlusta á í fjárlaganefnd. Það voru þeir sem fyrirfram var vitað að væru hlynntir sölunni. „Við fengum Seðlabankann í gær sem sinnir auðvitað eftirlitshlutverki. Þeir fóru yfir lagarammann og hvernig hann hefur verið styrktur eftir hrun,“ segir Steinunn.
Og efnahags og viðskiptanefnd fékk gesti frá Seðlabankanum, Bankasýslunni, Íslandsbanka og Samkeppniseftirlitinu til þess að fara yfir söluna. Hvers konar eiginlega vinnubrögð eru þetta? Hvar voru fulltrúar almennings sem á bankann? Það eru um 200 þúsund manns í verkalýðshreyfingunni en hún var ekki höfð með. Verkalýðshreyfingin hefur á að skipa fullt af sérfræðingum sem hefðu getað tjáð sína skoðun. En nei- þingmaður Vg sér ekki ástæðu til að kalla til sérfræðinga almennings.
Þrátt fyrir gríðarlega efnahagsdýfu og að augljóst sé að bankinn fari á slikk þá segir Steinunn: „Það hefur verið ýmislegt rætt hvað varðar þessa tímasetningu en mér hugnast þetta nokkuð vel.“ Ég er svo gáttuð að ég á ekki til eitt einasta orð. Meira að segja Sigmundur Davíð er uggandi um tímasetningu á sölu bankans.