Þorsteinn Sæmundsson á Alþingi:
„En Sjálfstæðisflokkurinn, utanríkisráðherra Vinstri grænna, segir: Nei, við getum ekki tekið við dollurum til þess að byggja þetta upp.“
Þorsteinn Sæmundsson um ríkisstjórnina: „Hún er ekki þátttakandi. Hún fylgist með. Hún er ekki frumkvöðull, hún er ekki skapandi. Hún er ekki afl sem skapar framfarir. Hún er ekki afl sem skapar framtíðarsýn. Hún er svona eftirlitsaðili, hún situr á hliðarlínunni og horfir á það sem er að gerast,“ sagði Þorsteinn Sæmundsson á Alþingi.
„Og akkúrat fyrir mánuði síðan, herra forseti, við þær aðstæður núna þegar við þurfum á öllu að halda til að byggja upp þjóðfélag upp til framtíðar, sem byggist m.a. á nýsköpun, hvað gerir ríkisstjórnin? Hún leggur niður Nýsköpunarmiðstöð. Þetta, herra forseti, er alveg dæmigert fyrir þessa ríkisstjórn. Þetta er m.a. út af því að í samsetningu ríkisstjórnarinnar endurspeglast einmitt stefnuleysið eða það eru það margar stefnur uppi sem við fáum aldrei að vita um og er gengið frá einhvers staðar bak við luktar dyr, að menn ná ekki fram. Hvar birtist þetta? Jú, þetta birtist m.a. í því að það má ekki nýta einkaaðila sem gætu stytt biðlista á kvalir fólks um marga mánuði. Það er bannað.“
Þorsteinn var ekki hættur:
„Og Sjálfstæðisflokkurinn lætur það yfir sig ganga. Það má ekki taka við peningum til þess að byggja upp í Helguvík og þar í grennd í kringum alþjóðaflugvöllinn á Reykjanesi af því að Mannvirkjasjóður NATO vill borga. Þessu kyngir Sjálfstæðisflokkurinn. Ég get ekki betur séð, herra forseti, á öllum þeim tölum sem við erum að horfa á núna að við gætum sem best notað þessa milljarða sem er staðfest að lágu fyrir og liggja fyrir til að byggja upp í Helguvík, þ.e. stækka þar höfn og vinna þar fleira sem hefur svo aftur á móti tengsl við flugvöllinn. En Sjálfstæðisflokkurinn, utanríkisráðherra Vinstri grænna, segir: Nei, við getum ekki tekið við dollurum til þess að byggja þetta upp. Höfum við efni á þessu núna? Nei. Höfum við efni á því að leggja niður Nýsköpunarmiðstöð núna þegar við þurfum á nýsköpun að halda? Nei. Þarna, eins og ég segi, brjótast fram og birtast þessar skrýtnu birtingarmyndir af því hvernig þessi ríkisstjórn er samansett.“
