Hvar eru bráðaaðgerðirnar sem forsætisráðherra boðaði í vor? Þjóðin bíður enn.
Guðrún Hafsteinsdóttir.
Alþingi: Guðrún Hafsteinsdóttir Sjálfstæðisflokki spurði Kristrúnu Frostadóttur forsætisráðherra um húsnæðispakka ríkisstjórnarinnar:
„Ef ætlunin er að gefa raunverulegan fyrirsjáanleika fyrir heimilin þá þarf að hækka mörk eða lengja nýtingartímann. En hvers vegna var ekki tekið upp afnám stimpilgjalda fyrir einstaklinga við íbúðakaup? Af hverju var ekki hækkuð endurgreiðsla virðisaukaskatts af vinnu á byggingarstað til að lækka byggingarkostnað? Af hverju var ekki skipulagslögum breytt til að losa um lóðir og víkka vaxtamörk á höfuðborgarsvæðinu án neitunarvalds?
Þetta eru raunverulegar bráðaaðgerðir sem ég nefni hér. Hvar eru bráðaaðgerðirnar sem forsætisráðherra boðaði í vor? Þjóðin bíður enn. Ef ríkisstjórnin vill ná raunverulegum árangri þá ræðst hún í þessar aðgerðir strax. Þess vegna er eðlilegt að spyrja: Hvers vegna kýs ríkisstjórnin ekki skýrar aðgerðir, lægri kostnað og hraðari uppbyggingu?“
„…og við erum stolt af því.“
Kristrún svaraði: „Hér talar forsvarsmaður minnihlutans sem stöðvaði Airbnb-frumvarpið í vor, sem var risastór bráðaaðgerð í húsnæðismálum. Hér er verið að tala fyrst og fremst fyrir aðgerðum sem ýta undir stórkostlega eftirspurn á húsnæðismarkaði, hafa ekkert með aukið framboð að gera og gera ekkert annað en að auka halla ríkissjóðs. Þetta er ástæðan fyrir því að við erum í þeirri stöðu sem við erum í í dag. Ástæðan fyrir því að við erum í vanda á húsnæðismarkaði er sú að hér áður var ríkisstjórn sem fyrst og fremst var að vinna í eftirspurnarhliðinni, var fyrst og fremst að gefa eftir tekjur eða gjöld án þess að fjármagna það og skapa þannig vítahring vanfjármögnunar ríkissjóðs og skorts á húsnæði. Þessi ríkisstjórn þorir og framkvæmir aðgerðir sem búið er að tala um í áraraðir. Þessi húsnæðispakki sýnir það svart á hvítu að við ætlum að fylgja eftir okkar loforðum og við erum stolt af því.“
Hér að ofan eru seinni ræður þeirrar Guðrúnar og Kristrúnar. Hægt er að lesa ræðurnar hér að neðan:
