„Sjáið þið ekki friðinn?“

Alþingi: Sigmundur Ernir Rúnarsson, þingmaður Samfylkingarinnar, skaut föstum skotum að Jens Garðari Helgasyni, varaformanni Sjálfstæðisflokksins á Alþingi í dag. Ræða Sigmundar fer hér á eftir:

„Sjáið þið ekki friðinn? var sagt í þessari pontu á dögunum og bent á Gaza. Er ekki hægt að senda flóttafólkið aftur? Nei, ég sé engan frið. Ég sé blóðugar þjóðernishreinsanir. Staðfest er að 75.000 Palestínumenn hafa verið drepnir á Gaza. 180.000 hafa verið særðir. Talan er líklega á þriðja hundrað þúsund þegar öll kurl eru komin til grafar. Á þriðja hundrað þúsund, þriðjungur börn. Sjáið þið ekki friðinn? Það er búið að rústa 90% af húsnæði á Gaza og verkfræðiher undir stjórn Ísraelshers ætlar að fletja restina út og koma fáum hræðum fyrir innan girðingar á Rafah, sem verða á endanum útrýmingarbúðir. Sjáið þið ekki friðinn? Er ástandið betra á Vesturbakkanum? Aldeilis ekki. Það er jafnvel miklu verra. 1.109 Palestínumenn hafa verið drepnir þar af Ísraelsher á síðustu tveimur árum, 11.000 særðir, 21.000 handteknir og eru í fangelsum. Sjáið þið ekki friðinn?

Ólívuakrarnir sem nema þúsundum hektara hafa verið upprættir og eyðilagðir, tré sem tekur hundruð ára að vaxa. Lífsviðurværi þessa fólks er tekið frá því, það kemst ekki á markaði, það kemst ekki á akrana sína og 35 þorp á þessum tíma hafa verið þurrkuð út á Vesturbakkanum í skjóli þess sem er að gerast á Gaza. Sjáið þið ekki friðinn, sjáið þið ekki öryggið? Eigum ekki að gera eins og við gerðum 1938 þegar við sendum flóttamenn frá Þýskalandi, gyðinga, aftur til Þýskalands í klær nasistanna? Eigum við að gera það aftur?

Ég sé engan frið. Ég sé ömurlegt stríð sem m.a. við berum ábyrgð á vegna aðgerðaleysis. Gaza og Vesturbakkinn eru Víetnam okkar kynslóðar, á ábyrgð okkar kynslóðar.“